Ötən həftə "Akcent”lə konsertindən narazı qalan gənc ulduz Aysel Əlizadə olanlar haqqında show.az-a danışdı. Təşkilati işlərdən şikayət edən müğənni xeyli ziyana düşdüyünü də söyləyib. "Konsertimdə səhnə arxası problemlər tamaşaçılardan gizli qalsa da, çox şadam ki, konsert uğurlu alındı. Təşkilatçının Faiq Əli olmağına baxmayaraq, ən ağır yük mənim çiyinlərimə düşmüşdü. Çünki təşkilati işləri də mən aparmalı oldum. Geyimimə, stilimə, atəşfəşanlığa, rəqs qrupuna xərclənən pullar bəs deyilmiş ki, "Akcent”in Bakıya gəlməsi üçün bilet pulundan tutmuş, oteldə qalmaq xərclərinə qədər mən çəkdim. Konsert zamanı təşkilatçını tapa bilmirdim ki, bəzi məqamları aydınlaşdırım. Onu da bildirim ki, mənimçün vəd olunan səhnə qurulmadı. Buna baxmayaraq mən tamaşaçılara verdiyim sözü tutaraq, qeyri-adi geyimi və performansı reallaşdırdım. Hətta aparıcı Rüfət Ağayev və Günel Hümbətova da mən səhnədə olarkən aparıcılıq etdikləri üçün zəhmət haqqlarını da mənim ailəmdən tələb ediblər. Əks halda məni səhnədə biabır edəcəklərini bildirib şantaj ediblər. Hansı ki, mənim nə onların aparıcılıq edəcəyindən, nə də onlara hansı məbləğin veriləcəyindən xəbərim yox idi. Bu işləri əslində təşkilatçı etməli idi. Hələ sadalamadığım başqa nüanslar da var ki, onları açıqlamaq istəmirəm. Amma bütün bu xərcləri özüm çəkdim. Bunu ona görə etdim ki, adımla bağlı layihə zəif, biabırçı şəkildə təqdim olunmasın. İstəmədim sonra kimsə desin ki, Ayselin konserti alınmadı və ya kiməsə borclu qaldı. Hər şeyin mükəmməl olması üçün əlimdən gələni etdim ki, sabah, başqa həmkarlarımda olduğu kimi maşınımı, evimi əlimdən almasınlar. Bir də onu deyim ki, sayəmdə antireklam olsa da, dırnaqarası təşkilatçı Faiq Əli əslində bacarmadığı bir iş təqdim edib, xeyli məşhurlaşdı. Ona bircə məsləhətim var, ya bu işi əməlli-başlı öyrənsin, ya da bacarmadığı işi öhdəsinə götürməsin. Mən bu vəziyyətdən çıxdım, başqa müğənnilər yazıqdır.”