"Maserati” avtomobil şirkəti dizellə işləyən ilk modelinin - "Ghibli” istehsalına hazırlaşır.
Rəsmi olaraq bu ayın sonunda Şanxay avtosərgisində nümayiş olunacaq avtomobil "Quattroporte” modelinə bənzərliyi ilə seçilir. 4,9 metr uzunluğunda olan "Ghibli” 274 at gücünə sahib turbo-dizel mühərriklə təchiz olunub. Bu 3 litrlik mühərrik "Ferrari” şirkətinin "Formula-1” yarışları üzrə sabiq mütəxəssisi Paulo Martinelli tərəfindən hazırlanıb. Mühərrik "Ferrari”nin İtaliyanın Modena şəhərindəki zavodunda yığılacaq. Dizel variantından əlavə "Ghibli”nin benzin versiyası da bazara çıxarılacaq.
Britaniyanın "Avto Ekspress” ("Auto Express”) jurnalında yer alan məlumata görə, "Maserati Ghibli”nin dizel variantı 50 min funt-sterlinqə (61 min 600 manat), benzin versiyası isə 60 min funt-sterlinqə (73 min 900 manata) satılacaq. Mütəxəssislərin fikrincə, "Ghibli”nin dizel variantı Böyük Britaniya daxil olmaqla bütün Avropada daha çox rəğbət qazanacaq.