Rabitə və İnformasiya Texnologiyaları Nazirliyində (RİTN) mobil rabitə operatorları rəhbərlərinin iştirakı ilə geniş toplantı keçirilib
Toplantıda nömrə daşınması (Mobile Number Portability – MNP) xidmətinin tətbiqi ilə bağlı mövcud vəziyyət təhlil edilib və müzakirələr aparılıb.
RİTN-in verdiyi məlumata görə, iclasda mobil nömrə daşınması xidmətlərini idarə edəcək RİTN-in Məlumat Hesablama Mərkəzi (MHM) ilə «Azercell Telekom», «Bakcell» və «Azerfon» şirkətləri arasında sellülar (mobil) nömrə daşınması xidmətlərinin göstərilməsinə dair müqavilələr imzalanıb və layihə ilə əlaqədar növbəti mərhələ başa çatıb.
Eyni zamanda, RİTN tərəfindən mobil nömrə daşınması xidmətlərinin göstərilməsinə başlanılma tarixinin tərəflərin bu xidmətin göstərilməsi üzrə hazırlığı nəzərə alınmaqla elan ediləcəyi qərara alınıb.
Xatırladaq ki, mobil nömrə daşınması xidmətinin tətbiq edilməsi üçün RİTN və mobil operatorlar tərəfindən birgə işlər həyata keçirilib, nömrə daşınması xidmətinin tətbiqi ilə bağlı normativ-hüquqi sənədlər qəbul edilib, onun fəaliyyəti üçün tələb olunan avadanlıqlar, yəni həm mərkəzi baza sistemi avadanlıqları, həm də mobil operatorların şəbəkələrində tələb olunan avadanlıqlar quraşdırılıb və uyğun test-sınaq işləri aparılıb.
Qeyd olunan texniki məsələlər öz həllini tapsa da, xidmətin tətbiqi və göstərilməsi ilə bağlı müvafiq proseduraları əks etdirən müqavilələrin imzalanması üzərində işlər aparılırdı.
Qeyd edək ki, MNP xidmətinin tətbiqi abunəçilərə operatoru dəyişəcəyi təqdirdə telefon nömrələrini saxlamaq imkanı verəcək.
Главная | Регистрация | Вход
