NASA "Curiosity" aparatının tapşırıqları icra etmədiyini açıqlayıb.NASA-nın ötən il Marsa göndərdiyi "Curiosity" kosmik aparatında nasazlıq baş verib. ABŞ Milli Aerokosmik Agentliyinin məlumatına görə, kosmik aparatın kompüterlərindən biri sıradan çıxıb, bunun nəticəsində aparat Yerdən göndərilən tapşırıqları icra etmir.
Hazırda NASA mütəxəssisləri fevralın 28-də baş verən nasazlığın aradan qaldırılmasına çalışırlar. "Curiosity" kosmik aparatı tapşırıqları yerinə yetirməsə də, Yerdən göndərilən siqnalları almağa davam edir.
Qeyd edək ki, "Curiosity" kosmik aparatı ötən ilin avqustundan bəri Mars planetində qurumuş çaylar, qruntda oksigen və xlorun mövcudluğunun əlamətlərini aşkar edib. Bu aparatdan istifadə etməklə Marsın tədqiq edilməsi proqramı ABŞ-a 2,5 milyard dollara başa gəlib.