"Rusiyada müşahidə olunan meteorit yağışının Azərbaycan üçün ciddi təhlükəsi yoxdur. Eyni hadisənin Azərbaycanda yaşanıb-yaşanmayacağını demək mümkün deyil". Bu sözləri mətbuata açıqlamasında Nəsirəddin Tusi adına Şamaxı Astrofizika Rəsədxanasının elmi işçisi Arif Qəmbərov deyib.
Onun sözlərinə görə, meteorit yağışı adi haldır, kainat, xüsusən də günəş sistemi bu cisimlərlə doludur: "Bu meteoritlərin hər birinin öz trayektoriyası var. Müəyyən vaxtlarda onlar kəsişir. Bütün dünya rəsədxanaları da hadisələri müşahidə edir. Amma onların qarşısını almaq mümkün deyil. Hər gün yer kürəsinə 200 min ton meteorit maddəsi yağır. Bu dəfə Rusiyada müşahidə olunan meteroitlər böyük olduğuna görə yerdə müşahidə olunub. Bunlar çox nadir hallardır. Meteorit yağışı əsasən, avqust aylarında müşahidə olunur”.
A.Qasımov bu gün axşam yerə yaxınlaşacaq asteroidin təhlükəsinə də aydınlıq gətirdi: "Bu asteroid yerin yaxınlığından keçsə də, təhlükəli hesab olunmur. Bunu axşam saat 24:00-da NASA canlı yayımla izləyəcək. Bu asteroid geostasionar orbitdən daha aşağı səviyyədən keçəcək. Bütün rabitə peykləri geostasionar orbit səviyyəsində yerləşir. Amma bu asteroid uzaqdan gəlib yüksək sürətlə keçdiyinə görə, Yer kürəsində təhlükə yaratmayacaq. Həmçinin bu cismin kütləsi də az olduğuna görə rabitə xətlərinə də təsir etməyəcək”.
Onun sözlərinə görə, asteroid orbiti dəqiq olmadığına görə onun yerə yaxınlaşma məsafəsini demək mümkün deyil. Bu, təxminən 17-25 kilometr yaxınlıqdan keçəcək. Asteroidin diametri 40 metr, çəkisi isə 130 min tondur