Alimlər nəhayət ki, Hz. Nuhun gəmisinin tufandan sonra harada dayandığını tapıb. Əhatəli araşdırma aparan elm adamları bütün işarələrin gəminin Cudi dağında dayandığını göstərdiyini açıqlayıblar. Türkiyənin Şırnak Universitetinin üzvləri müqəddəs kitablar da daxil olmaqla bir çox qaynaqların gəminin Cudidə olduğunu yazdıqlarını bildiriblər. Araşdırma zamanı Cudi dağı ilə Şırnak bölgəsindəki bir çox kənd və bölgə adlarının da Hz. Nuhun soyundan gəldiyi məlum olub. Araşdırma haqqında məlumat verən Şırnak Universiteti İlahiyyat Fakültəsi Ərəb dili üzrə Dos. Dr. Abdülmuttalip Arpa müqəddəs mətnlər ilə yazılı qaynaqlardan yola çıxaraq bu qənaətə gəldiklərini deyib: "Hz. Nuhun gəmisi Cudidə dayanıb, Nuhun özü də Cizrə ətrafında yaşayıb. Mesopotamiyadakı ən yüksək dağlardan biri olan Cudi suların yer üzündən çəkilməsindən sonra Nuhun gəmisinin enməsi üçün ən uyğun yerdir”. A.Arpa gəminin Cudidə dayandığını sübut edən dəlillərdən birinin də Cudi dağındakı zirvənin "Nuh peyğəmbər ziyarət təpəsi” adlanması olduğunu qeyd edib. O, həmçinin, təpənin ortasında ətrafı daşlarla əhatə olunmuş sahənin də "Sefine”, yəni gəmi adıyla tanındığını vurğulayıb.